–انا شاكر لك اخوي احمد على هذا الطرح و بصراحه أنا أول مره أزور مدونتك و عن طريق قوقل دخلت لموقعك لاكن ما أخذت منك و لا ريال لأني نسخت الرابط في متصفحي و أنا شدني موضوعك و هذي أول مره ارد فيها على موضوع في أحد المدونات مع العلم أني ازور المدونات بشكل مستمر و سامحني اذا كانت كتابتي مشعتره قليلا , بالتوفيق أحمد– *اعجابي

“”يعني هل تذكر يوم جا واحد عندك في المكتب ولا الاستراحة وقال لك عن مسلسل اخرجه الحمود وجلس يعلق على احداثه ؟”"

لا الحمود ولاغيره

قد نجتمع باكثر من مكان مكتب عمل استراحه مع العائله الاصحاب اينما يكون ,, لا تأخذ مثل هذه البرامج العاديه من اوقاتنا شيئا الا ان يكون برنامجا دعويا مؤثرا لتعم الفائده ويذكر الله او مسلسلا قويه او فيلما بليغا ادهش الناس, اما ان يأتي احد على ذكر مسلسلات مثل التي تعرض على قنواتنا و(الطقطقه ) على احداثه ليمر الوقت , لم يحدث هذا وان حدث اتوقع عند اجتماعات البنات او الjobless ,, وقصة ان يأتي زميل لي في العمل ويحدثني عن مسلسل سعودي- اخرجه الحمود او لم يخرجه- ينقد اكثر من ان يمدح , هذا ما لا اتوقعه ابدا ,, الا ان يكون فعلا مسلسلا قويا واحدث ضجه واحداثه واقعيه مثلت بطريقة مبدعه- ولااعتقد حصول هذا في الدراما السعوديه- عندها قد اراه او اسمع عنه اكثر .

في النهايه
احترم جميع وجهات النظر فهي تزيدني وتكسبني المرونه ولا تضرني

عاصم احمد المحمدي

مسلسل عيال قريه مسلسل جميل رغم الأخطاء
يجعلك تضحك من الاعماق ..

شكراً احمد ..

المسلسل تاااافه جدا والقصبي متصنع , حركاته اللي يحسب انها مضحكه مافيها اي ابداع واي فكاهه واي تجديد لدرجة الملل .. استغرب فعلا ممن يتابع المسلسل بحماس ويضحك له ,, في النهاية هي مسألة اذواق

والمقارنه بالمسلسلات الاجنبيه الناجحه ليس بمحله على الاطلاق
فكما ذُكر , فرق بيننا وبينهم ولهذا يتم الحكم بدون اي مقارنه من اي جهه

@ بدر الشايع : والله من ناحية فاشل فالكل أجمع انه فاشل .. وخطأ الهلال والنصر خطأ مساعد المخرج وخطأ مايغتفر على قولتهم ..

@ أحمد المغلوث : هذا الكلام .. أجل انت مثلي

@ nOud.a.s : الى حد ما اتفق معك في نقطة الطويان .. بالفعل شايل المسلسل والمشاهد اللي يطلع فيها غير شكل

أبد ماهنا طول .. حيااااك

@ ـألمىآ : من ناحية سلبيات فهو مليء بالسلبيات لكن مع ذلك انا اشوف انه احسن مايعرض الان

@ توتو : الاخراج قلتها في اول الكلام .. شكلهم جايبين سباك .. يعني مرة الوضع دمار ولا فيه أي فكرة حتى اختيار زوايا الكاميرا عادية مرة .. لو اشتغلوا من دون مخرج ابرك

@ عبدالرحمن الجوني : ما اشوف فيه هذيك الاساءة يعني .. طلعوا في مشهد واحد اللي هو تجمهم وقت صلاة وهذا امر يصير يعني .. يعني ناخذ عليهم طريقة كلام رجل الهيئة واسلوبه ..

@ princejimi : لو ما كفى الموضوع إلى تواجدك ( ولايهون كل اللي ردوا ) .. لكفى .. حياك الله

@ نورة : وجهة نظرك وكثير يشوفون انه فاشل ..
صعب نقارن نفسنا بالكويت من ناحية الكوميديا والفن .. الكويت بلد أكثر تحضر منا وسابقنا بسنوات .. وصناعة الأعمال عندهم من أكثر من 30 سنة ممثلين ومخرجين وكتاب سيناريو ومؤلفين وكومبارس ومواقع تصوير .. يكفي عندهم معهد فنون جالس يفرخ طاقات ..
ربعنا لو بيصرون مشهد على طريق العليا يبي لهم معاملات وروحات وجيات عشان مشهد تصوير خارجي .. لذلك ينحدون على سوريا والاردن

@ أبو محمد : وجهة نظرك مثل نورة .. ورؤيتك أحترمها ..

@ قل انك تمزح : أولاً أنا سعيد بمداخلة بمثل هذا الفكر والاسلوب .. وحقيقة انا كنت اتمنى اعرف اسمك الاول او حتى اسمك المستعار ..

في النقاط باخذها معك وحدة وحدة :

أولاً : الاخراج .. الكل متفق انه دمار دمار وبقوة .. وياليتهم مخلينه على الغانم على الاقل ابرك شوي وفيه تفاهم بينهم

ثانيا : لا بالعكس محدودية الموقع سبب رئيسي للنجاح ، ما ادري ان كنت مطلع على المسلسلات الكوميدية الأمريكية فرندز وساينلفد وريموند – طبعا بدري بدري مليون مرة نوصل مستواهم او نقارن فيه – لكن غالبية هالمسلسلات الخفيفة تعتمد على ثلاث مواقع او 4 مواقع تصوير بس .. مثلا مسلسل فرندز المقهى وشقة البنات وشقة الشباب .. ريموند .. الصالة والمطبخ وصالة بيت الجد وغرفة النوم .. ، بالعكس المحدودية اشوفها تبسط العمل وتخلي رتمه اهدا واكثر سلاسة .. وحتى تسبب الفة بين المشاهد والمكان

ثالثا : الحوارات .. اتفق معك في اللي قلته وبصراحة كتابة السيناريو فن وربعنا ماعندك احد .. تتذكر ايام عصويد والمسلسلات القديمة تدري ان الللي يكتب السيناريو مصاريا واردنيين ثم تسعود للهجة السعودية لاحقا ؟

رابعا : انت تشوف انه سلبية انا اشوف انه ميزة .. ومثل ماقلت في البداية المسلسل من النوعية الخفيفة والبسيطة اللي مافيها دوشة ولا احداث كثيرة .. وهذا ستايل خاص وفن بحد ذاته ، يعني مثلا انا مسجل كل الحلقات عندي ومتأكد انه بعد رمضان مثلا باسبوعين لما اتغدى ولا اكل حاجة .. عادي ارجع اتفرج على الحلقة الخامسة مثلا .. ولا اشوف مشهدين من الحلقة السادسة .. ولا اعيد مشهد الفقع .. واضحك .. ، وهالستايل مثل ماقلت لك موجود وطبق في الخليج كذا مرة .. مثل الحيالة مثلا رغم اني ما صرت اتابع من تالي .. بس الحيالة لو القى اي حلقة معادة لو الحلقة 17 اجلس اتفرج واضحك .. مكان فيها هذا الاحداث الكثيرة والحبكات المتنوعة .. خلف ودواس ومسابيح وخواتم .. وخواتم ومسابيح

خامسا : محدودية الاشخاص انا ماودي اعيد الكلام لكنه مقارب للنقطة الثانية ، مسلسل فرندز ( واكرر انه بدري علينا المقارنة .. استمر 9 سنوات ولا فيه الا 7 شخصيات بس .. ، مسلسل ريموند العائلة (4 اشخاص والجد والجدة وولدهم الكبير) .. ، بالعكس هذي ميزة للمسلسلات اللي من هالنوعية (البسيطة والخفيفة ) ..

سادسا : القضية وجهات نظر وانا اخوك .. انا اشوف الطويان – وغير بعد يشوف كذا – انه رقم 1 في المسلسل .. وحلاته يمثل بالبركة على قولتك يعني مافيه اي تصنع .. احيانا اقول لنفسي انهم يدخلون المشهد من دون مايقرأ نص هههههه ، السناني صراحة بدع وانا معك في هالشي واعتقد انه اعاد اكتشاف نفسه من جديد ..

سابعا : انت ماتاخذها من مفهوم النقد بمفهومه الواسع وحاجته الى طرق لتوصيلها ، خذ المفهوم من أقل مستوى .. يعني الاستراحة اللي فيها سليم وكريم نماذجها متكررة في كثير من الاستراحة .. يعني فخري ولد نشيط وراعي روحات وجيات .. وراعي العرق اللي فيه من امثاله بمجتمعنا بالمئات .. وعلي ابراهيم انا اشوف دوره نموذج في كل استراحة .. يعني كل استراحة يجي فيه نوعية من علي ابراهيم واحد يعلق بفكره الخاص ولا يهمه الباقين .. ( ترى عندنا في الاستراحة واحد مثله ههههههه ) .. بس دوره جميل مرة ومداخلاته حلوة

ثامنا : الاخطاء اللي ذكرتها صح .. ولا يقع فيها واحد مبتدئ حقيقة خاصة سالفة المكالمات التي لم يرد عليها .. هذي قوية

تاسعا : (مافيه تاسع ) .. المسلسلات الثانية حاولت اتابعها اكثر من مرة بس ماقدرت ، الحمود اصنفه مخرج فاشل حقيقة وله 10 سنوات مو قادر يطلع مسلسل تقدر تتابع حلقة واحدة منه يمكن استثني العولمة .. يعني هل تذكر يوم جا واحد عندك في المكتب ولا الاستراحة وقال لك عن مسلسل اخرجه الحمود وجلس يعلق على احداثه ؟ .. مافيه ابد
الحيان انا اشوف عمله موجه للاطفال وهذا مافيه اهانة له .. بس لو يتجه هالتوجه اشوفه افضل خاصة بعد المؤثرات الصوتية ، المالكي انا مقتنع انه مهوب فنان ابد .. يعني شخص يعتمد على التعليقات السريعة وردة الفعل السريعة ايضا والنكات اللي فيها سطحية ومكررة في أغلب الاستراحات … اوكي احيانا يضحكك لكنه مو قادر يدخل في الشخص ويقنعه بالعمل
سعيد بمداخلتك ولو انك اهلكتني بالرد .. ههههه بس مبسوط من جد انه فيه احد عنده هالرؤية حتى ولو كنت مختلف معه ..

أولاً الإخراج ،، وهو فعلاً مهزلة في هذا المسلسل .. إخراج أفلام الستينات المصرية أفضل منه ،، ومخرج مغمور غير متمكن البتة .. عبدالخالق الغانم (على انه مهوب ذاك الزود) لكن يظل افضل من هذا المخرج بمليون مرة ، كاميرات التصوير قديمة جداً والتصوير لا يليق بأن يعرض على قناة MBC حتى اللقطات الإخراجية مضحكة وليس هناك أي احترافية بالتصوير (المخرج بس مبسوط بالدجاجة اللي تبيض في البداية) الكل متفق على سوء الإخراج والتصوير وأنها سقطة بحق عبدالله وناصر

ثانياً مواقع التصوير .. شيء عجيب ان تقول ان محدودية أماكن التصوير نجاح للعمل ولا أدري من أين بنيت هذه النظرية .. فالتصوير يتم فقط بعمارة قديمة ثم باستراحة .. وهو لعمري أمر مخجل (الله يذكر ايام طاش بالخير) ،، حيث ان تعدد اماكن التصوير من أسباب نجاح العمل لكي لا يطغى عليه الرتابة والملل كما هو حاصل

ثالثاً الحوارات .. لا أحد يختلف على أن المسلسل من أبطأ المسلسلات في تاريخ الدراما السعودية ومن أطولها حوارات وليتها حوارات مهمة بل حوارات أتفه من التفاهة ،، تخيل انهم أي شغلة يسوونها يرجعون يحكونها من جديد !! يعني لو يصير شي بالاستراحة راحوا قالوه لابو ضاري من طقطق لسلامو عليكم .. وينا فيه يبوي .. الحلقة تخلص على نص حدث ،، والحوارات تعاد مية ألف مرة (مثل سالفة غرزت بعرعر) وهذا يدل على ضعف وشلل رباعي بالنص ..

رابعاً سير الأحداث .. أجد نقطة عجيبة منك هنا وأنت تقول (فلو فوت حلقة اليوم فلا ضير في أن تتابع أحداث المسلسل في اليوم التالي) يا أخ أحمد هذه ليست ميزة بل من أكبر سقطات المسلسل ،، التمطيط المبالغ فيه ،، ولو شاهدت مسلسل مثل (بريزن بريك) أو حتى (باب الحارة) وغيره من المسلسلات المحترفة لوجدت أنك لو فوتت حلقة فـ الله يعينك لأن الحلقة يحدث فيها أحداث كثيرة متنوعة وليس نصف حدث ! أما إذا كنت تناقض هذه النقطة وتعتبر قلة الأحداث وندرتها ميزة فأنت تناقض أهم أساسيات العمل الفني بل وأساسيات القصة والرواية حتى

خامساً محدودية الشخصيات في العمل هذه سلبية كبرى وليست ميزة أيضاً !! فالعمل المكون من 30 حلقة لا يصنع أحداثه سوى (سليّم) و (كريّم) ويدخل على الخط (ابوضاري) و(الخال) و(ابوسعد) .. أما البقية فهم كومبارس مع مرتبة الشرف .. وهنا لا يوجد مجال خصب لتعدد الأحداث وخلقها ولا لإضفاء حبكة درامية على النص بل سيستمر العمل كما هو على نفس الرتابة ، لا أحداث ولا وجوه ولا شيء جديد ..

سادساً الشخصيات نفسها .. إعجابك بشخصية الطويان لا يعني أن تجعلها في القمة فهو إعجاب شخصي فقط .. أما من الناحية الفنية فهو مجرد رجل كبير بالسن أشبه بالأمي لا يجيد تنفيذ الحوارات ولا يجيد التمثيل بل يمثل (بالبركة) وعلى النية ،، حتى انه يقطع بعض الحوارات لضعف قدراته الفنية ويعيد دوماً نفس كلماته (أزعجنا بالصنطران يحسب نفسه كوميدي) .. قارن بينه وبين تمثيل عبدالإله السناني الجميل والمميز الذي أعتبره أفضل شخصية بالمسلسل

سابعاً كاركترات المسلسل .. انحصر المسلسل في كاركترات ليس لها أي قدرة على توجيه النقد لأحداث المجتمع فسليم وكريم مجرد تنفيذيين لغرض تسلسل الأحداث .. أما ابوضاري فكما قلت (إنك لا ترجو من الشوك العنب) أما الكاركتر الوحيد الذي ينتقد فهو علي إبراهيم ، والنقد يا سادة لا يتم بهذه الطريقة المباشرة الغبية .. بل يتم عبر خلق أحداث تدعو للنقد (مثل حلقة المزاين ولو انهم مسخوها في حلقتين وكل شوي يعيدون نفس حواراتهم عن الخمسطعشر مليون) النقد لا يتم عبر حوار بالاستراحة !! ليس النقد في المسلسلات عبارة عن نقاشات عابرة بل هذا هو أرخص أنواع النقد وأغبى طرق توصيل المعلومة (ارجع واقول الله يذكر طاش بالخير) وأيضاً لو تلاحظ أن جميع انتقادات علي إبراهيم تواجه بالرفض من الكل ويعتبرونه شخص ناقم على المجتمع ويتم تصوير آرائه على أنها خطأ وانه غلطان ويجب عليه السكوت، وبالتالي كنك يبوزيد ماغزيت

ثامناً أخطاء فظيعة بالنص والحوار .. حتى الحبكة لا يجيدونها ولا قد شفت مباراة للهلال والنصر بالظهر!! وغيرها مثلاً الحلقة يوم سليّم يسوي مقلب بكريّم كانت حلقة مليئة بالأعاجيب والصدف غير المقبولة .. فلإتمام النكتة الماصخة ،، كريّم لم يخبر سليم عن الموعد والسبب (ان وجهه نحس!!) بداية جيدة لصدف متلاحقة ،، ثم يقوم سليّم بتغيير جميع الساعات (شف الصدفة ماحصل المقلب الا يوم صار عنده موعد) لا وثالثة الأثافي سليّم يحط الجوال صامت !!! (يعني كنه عارف ان ابوسعد يبي يتصل) .. ماعلينا .. يقوم كريّم من النوم وينظر لساعة الجوال ولا يجد مكالمات ابو سعد التي لم يرد عليها !! كيف يشوف الساعة ولا يشوف المكالمات اللي لم يرد عليها !! ولا بسوريا جوالاتهم غير جوالاتنا !!

خلاصة الكلام … مسلسل عيال قريّة سقطة فنية / إخراجية / إنتاجية / سعودية كبرى .. أما المسلسلات السعودية الأخرى فما دمت لا تتابعها إذن لاتحكم على فشلها .. مسلسل بيني وبينك 2 على فشله الذريع هالسنة إلا انه يبقى افضل من عيال قريّة .. وغشمشم مسلسل طفولي فعلاً لكن على الأقل ليس بسوء عيال قريّة

أول مرة اناقضك بآرائك العادة دايم متفق معك خخخخخخخ لكن من جد مدري وش تبي انت وهالمسلسل المخيس

شكراً لك

أيضا الإستظراف الزائد عن حده

سوء اللهجة المبني عليها العمل

المبالغة في الفعل وردة الفعل

الإخراج لك عليه

بالفعل العمل مليء بالأبطال لكن النتيجة لم تكن بالمستوى المأمل منهم

دمتم برعاية الله